Ötən il dekabrın 29-da Neftçala şəhəri, Heydər Əliyev prospektində velosipedlə hərəkət edən Zamiq Məmmədovu "Mitsubishi Pajero" avtomobili ilə vuran Qalib Salmanovun məhkəmə prosesi başa çatıb.
Teleqraf.az xəbər verir ki, məhkəmə avtomobili sərxoş vəziyyətdə idarə edən Qalib Salmanovu 9 ay müddətinə azadlıqdan məhrum etsə də, onun cəzası şərti hesab olunub.
Təqsirləndirilən şəxs məhkəmədə bildirib ki, rayonun tanınmış ağsaqqallarındandır, həmişə nümunəvi davranmağa və digərlərini qanunsuz hərəkətlərdən çəkindirməyə çalışıb. Rayonda hörmət və nüfuza malik olduğunu, bu yaşında belə bir hadisənin başına gələcəyini heç vaxt düşünmədiyini deyib. Əməlinə görə peşman olduğunu, zərərçəkmişlə barışdığını və vurulan ziyanı tam şəkildə ödədiyini bildirib.
Zərərçəkmiş bildirib ki, işsiz olduğu üçün dekabr–yanvar aylarında Yeni il bayramı ilə əlaqədar onu dəvət edənlərin evlərinə gedib uşaqları əyləndirirmiş. Şaxta baba paltarında velosipedlə hərəkət edərkən arxadan zərbə alıb yıxılıb və huşunu itirib, ayılanda isə artıq Salyan rayon xəstəxanasında olduğunu görüb. Sonradan onun Qalib Salmanov tərəfindən vurulduğu məlum olub. Təqsirləndirilən şəxs bütün müalicə xərclərini ödədiyi üçün zərərçəkmiş onunla barışdığını və heç bir şikayətinin qalmadığını deyib.
Qeyd edək ki, Qalib Salmanov velosipedlə hərəkət edən şəxsi vurduqdan sonra irəlidəki saat qülləsi ilə toqquşub.
Ad və soyadlar şərtidir.
