Salyanda 48 yaşlı kişinin qonşusunu öldürməsi ilə bağlı təfərrüatlar məlum olub.
Hadisə 19 oktyabr 2024-cü ildə Salyan şəhərinin Əlibəy Hüseynzadə küçəsində baş verib. 1977-ci il təvəllüdlü Elşən Səmədov mübahisə zamanı qonşusu Əziz Salayevi daşla vuraraq öldürüb.
İstintaqa görə, hər iki şəxs sərxoş vəziyyətdə olub. Əziz Elşəndən siqaret tələb edib, cavab almayanda nalayiq ifadələr işlədib və əlbəyaxa davada onu yerə yıxaraq döyüb. Qonşular tərəfləri ayırdıqdan sonra əsəbiləşən Elşən yerdən daş götürərək onu təxminən 2–3 metr məsafədən vurub. Əziz aldığı xəsarətdən hadisə yerində ölüb.
Elşən Səmədova Cinayət Məcəlləsinin ehtiyatsızlıqdan ölümlə nəticələnən ağır xəsarət maddəsi ilə ittiham verilib. O, ifadəsində özünü təqsirli bilməyib, Əzizin dəfələrlə onu və ailəsini təhqir etdiyini, davada ona gücünün çatmadığını, daş atanda öldürmək niyyətinin olmadığını deyib. Hadisədən sonra təcili yardıma zəng etdiyini və Əzizin huşunun yerində olduğunu bildirib.
Zərərçəkmişin oğlu Mirzağa Salayev atasının içki aludəçisi olduğunu, mütəmadi mübahisələrə qarışdığını deyib. Hadisə barədə tam məlumatlı olmasa da, Elşəni bağışladığını, lakin barışmadığını bildirib.
Lənkəran Ağır Cinayətlər Məhkəməsi Elşən Səmədovu 9 il müddətinə azadlıqdan məhrum etməklə ümumi rejimli müəssisəyə göndərib. Təqsirləndirilən şəxs hökmün ləğvi və bəraət, müdafiəçisi isə onun əməlinin Cinayət Məcəlləsinin zəruri müdafiə həddini aşma maddəsi ilə tövsif edilməsini tələb edib. Lakin Şirvan Apellyasiya Məhkəməsi şikayətləri təmin etməyib.
