Masallıda “Vətənin ölməz oğulları” layihəsi çərçivəsində növbəti tədbir keçirilib. Bu haqda məlumatı Cenublu.az bu gün, 2 avqust tarixində Masallı rayon İcra Hakimiyyətinə istinadən verir.
Tədbiri giriş sözü ilə açan Tarix-Diyarşünaslıq Muzeyinin direktoru Əntiqə Tağıyeva keçirilən layihənin əhəmiyyətindən danışıb. O, may ayında doğulan, Birinci Qarabağ və 44 günlük Vətən müharibələrində döyüşən əsgər və zabitlər haqqında geniş məlumat verib.
Daha sonra Vətən müharibəsində qazandığımız Zəfərin xalqımızın minlərlə qəhrəman övladının canı-qanı sayəsində əldə edildiyindən ətraflı danışılıb. Natiqlər qeyd ediblər ki, ölkəmizdə həyata keçirilən uğurlu dövlət siyasəti sayəsində xalqımıza ucalıq bəxş edən oğullar, onların ailələri və övladlarına daima dövlətin qayğısı göstərilir. Şəhidin anası Günay Seyfullayeva, qardaşı İslam Alışov onlar üçün övlad, qardaş itkisinin nə qədər ağır olsa belə, qəhrəmanlarımızla qürur duyduqlarını qeyd ediblər. Yekunda tədbirdə iştirak edən, may ayında doğulan şəhidlərin ailələrinə muzeyin “Təşəkkürnamə”ləri təqdim olunub.
Qeyd edək ki, tədbir Masallı Tarix-Diyarşünaslıq Muzeyi, Dövlət Rəsm Qalereyası, “Ümidim sənsən” sosial inkişafa yardım ictimai birliyinin birgə təşkilatçılığı ilə Birinci Qarabağ və Vətən müharibələri qəhrəmanlarının tanıdılması məqsədilə keçirilib.
