Lerik rayonunda qarlı hava şəraiti müşahidə olunur.
Cenublu.az xəbər verir ki, ötən gündən rayon mərkəzi də daxil olmaqla bütün kəndlərə qar yağıb.
Rayon Fövqəladə Hallar Komissiyasının sədri Habil Məlikovun verdiyi məlumata görə, hazırda rayon mərkəzində qarın hündürlüyü 10–15 sm, dağlıq ərazilərdə isə 20–25 sm təşkil edir.
Onun sözlərinə görə, rayonun əsas magistral yolu olan Lənkəran–Lerik avtomobil yolu açıqdır. Rayon mərkəzindən kəndlərə gedən yollarda da hərəkət üçün hər hansı problem yaranmayıb. Həmçinin elektrik enerjisinin verilişində, təbii qaz və su təchizatında fasilə qeydə alınmayıb.
Qeyd edək ki, cənub bölgəsinin digər rayonlarında isə əsasən yağışlı hava müşahidə olunur.
