Lənkəran Dövlət Universitetinin dosentinin "Sitrus bitkiləri gübrələnməsinin elmi-praktik əsasları" adlı monoqrafiyası çap olunub. Bu haqda məlumatı bu gün, 1 avqust tarixində universitetin Facebook səhifəsinə istinadən veririk.
Fəlsəfə doktoru Xalıqverdi Babayevin monoqrafiyası “Elm” nəşriyyatında çap olunub. 3 bölmə və 8 fəsildən ibarət kitabda müəllifin uzun müddət ərzində Lənkəran-Astara subtropik bölgəsində sitrus bitkilərinin gübrələnməsinin nəzəri və praktik məsələlərinin həllinə həsr edilmiş elmi-tədqiqat işlərinin tətbiqi materialları təqdim edilib.
Çapdan çıxmış kitabdan ali təhsil müəssisələrinin "Aqronomluq", "Torpaqşünaslıq və aqrokimya" və digər ixtisaslarında təhsil alan tələbələr, magistrantlar, doktorantlar, həmçinin fermerlər yararlana bilərlər.
Qeyd edək ki, Xalıqverdi Babayev respublikanın və xarici ölkələrin jurnallarında nəşr olunmuş 70-dən çox elmi məqalənin müəllifidir. Onun, həmçinin 1 monoqrafiya, 1 kitabça və ali təhsilin bakalavriat pilləsi üçün 3 tədris proqramı nəşr edilib.
