Lənkəranda kişi arvadına sataşan həmkəndlisinə dostu ilə birgə işgəncə verib.
Cenublu.az-ın əldə etdiyi məlumata görə, hadisə şəhərin Füzuli küçəsində qeydə alınıb.
İttiham aktına əsasən, Lənkəran şəhər sakini 34 yaşlı Cavid Vəliyev birgə yaşadıqları evdə arvadının telefonuna “Niyə cavab verməmisən?” kimi səsli mesaj gəldiyini görüb. O, mesaj yazan şəxsin arvadı ilə birgə Sütəmurdov kəndində yerləşən çay zavodunda işləyən Qurban olduğunu müəyyən edib. Arvadı ilə Qurbanın sevgi münasibəti yaşadıqlarından şübhələnərək qisas almaq qərarına gəlib. Bu barədə dostu Səlimə də bildirərək, onunla əlbir olub.
Onlar Füzuli küçəsindəki avtomobil sexinin qarşısında Qurbanı Səlimin maşınına mindirərək, sonuncunun evinə aparıblar. Evə daxil olaraq Cavid arvadını Səlimə göstərərək onun namusuna göz tikdiyini deyib. Ardınca zərərçəkəni 10-15 dəqiqə nalayiq ifadələrlə təhqir ediblər.
Daha sonra təqsirləndirilən şəxslər zərərçəkəni alçaltmaq üçün onu zorlayıblar. Bununla yanaşı Cavid “Sənin arvadına da belə hərəkət etsələr, keçərsən?” sualına zərərçəkənin “Hə, keçərəm” deməsindən qəzəblənərək, balta ilə Qurbanı ölümlə hədələyib.
Bu əməllərindən sonra Cavid və Səlim saxlanılaraq barələrində Cinayət Məcəlləsinin müvafiq maddəsi ilə cinayət işi başlanıb. Hər iki şəxs istintaq zamanı Qurbandan üzr istədiklərini, himayələrində azyaşlı uşaq olduğunu və zərərçəkənə dəymiş ziyanı ödədikləri üçün barələrində yüngül cəza verilməsini xahiş ediblər.
Lənkəran rayon Məhkəməsinin qərarı ilə hər iki təqsirləndirilən şəxs barəsində 1 il müddətinə azadlıqdan məhrumetmə cəzası təyin olunub.
Qeyd edək ki, adlar şərti verilib.
