Lənkəranda valideyn himayəsindən məhrum olan və xüsusi qayğıya ehtiyacı olan uşaqlar üçün yay düşərgəsi təşkil olunub. Bu haqda məlumatı Cenublu.az bu gün, 3 avqust tarixində verir.
Lənkəran şəhər Gənclər və İdman İdarəsi tərəfindən 2-4 avqust tarixlərində keçiriləcək düşərgədə Osman Mirzəyev adına qarışıq tipli Uşaq Evində və 2 nömrəli Ailə tipli kiçik qrup evində yaşayan 35 yeniyetmə və gənc iştirak edib.
Düşərgənin ilk günündə Lənkəran Nömrə 1 Psixoloji Mərkəzin klinik psixoloqu Nigar Sadıqova uşaqlarla şəxsi inkişaf planı haqqında danışaraq bildirib ki, istədiyimiz sahələrdə özümüzdən ən yaxşı nəticələr əldə etməyimizə kömək etmək üçün planın olması vacibdir.
Daha sonra Azərbaycan Vətən Müharibəsi Veteranları İctimai Birliyi (AVMVİB) Lənkəran rayon şöbəsi sədrinin müavini Saleh Dostiyev və Vətən müharibəsi qaziləri torpaqlarımızın işğaldan azad edilməsi zamanı gənclərimizin göstərdiyi qəhrəmanlıqlardan danışıblar.
Həmçinin uşaqların asudə vaxtlarını səmərəli keçirmək məqsədilə müxtəlif eyləncəli oyunlar təşkil edilmişdir.
Qeyd edək ki, düşərgənin keçirilməsində əsas məqsəd valideyn himayəsindən məhrum olan uşaqlara diqqət və qayğını hiss etdirmək, eləcə də onların cəmiyyətə adaptasiyasını təmin etməkdən ibarətdir.
