Bu gün Vətən müharibəsi şəhidi, Füzulinin azad olunmasında qəhrəmanlıq göstərən igid Zaur İsmayılzadənin mövlud günüdür.
Zaur Nizami oğlu İsmayılzadə 29 iyul 1995-ci ildə Lənkəran rayonunun İstisu qəsəbəsində anadan olub. 2001-2012-ci illərdə şəhid Vüqar Məmmədov adına Cəlilabad rayon Göytəpə şəhər tam orta məktəbində təhsil alıb. Hərbi xidmətini başa vurduqdan sonra müxtəlif MMC-lərdə mühafizəçi kimi işləyib. Aprel döyüşləri zamanı Azərbaycan Xüsusi Təyinatlı Qüvvələrinin sıralarında xidmət edib. O, döyüş zamanı ağır yaralanıb və səhhətində problemlər yarandığı üçün 2017-ci ildə ordudan tərxis olunub.
Vətən müharibəsində könüllü iştirak edən igidimiz 7 oktyabr tarixində Füzuli rayonu istiqamətində döyüş tapşırığının yerinə yetirilməsi zamanı şəhid olub.
Ölümündən sonra “Vətən uğrunda”, “Cəsur döyüşçü” və “Füzulinin azad olunmasına görə” medalları ilə təltif olunub.
