Xalq artisti Ağadadaş Ağayevin keçmiş həyat yoldaşı Lalə Əliyeva məhkəməyə müraciət edərək, 2018-ci ildə tərəflər arasında təsdiqlənmiş barışıq sazişinin etibarsız sayılmasını tələb edib. O, boşandıqdan sonra nikah dövründə əldə olunan əmlakın bölünməsi ilə bağlı iddia qaldırmış və “Büsat” şadlıq sarayının, “Vüsal” kafesinin, eləcə də idman kompleksinin birgə mülkiyyət kimi nəzərə alınmasını istəyib.
Sazişə əsasən, Lalə Əliyeva Mərdəkandakı villaya və digər əmlak hüquqlarına iddia etməkdən imtina etmiş, əvəzində Ağadadaş Ağayev bank qarşısındakı 86 716 ABŞ dolları və 14 299 manatlıq kredit borcunun öhdəsinə götürülməsinə razılıq vermişdi. Həmin vaxt sənətçi həm də həmin villadakı mülkiyyət hüquqlarından əl çəkəcəyini bildirmişdi.
Lalə Əliyeva deyir ki, milyonlarla dəyəri olan bu bağ evi illər öncə qızları üçün nəzərdə tutulub və hələ 2003-cü ildə onların doğum günündə evin təməlinin qoyulması hədiyyə kimi planlaşdırılıb. Onun sözlərinə görə, 2018-ci il məhkəmə prosesində Ağadadaş Ağayev kredit borcunu ödəyəcəyini, evin banka keçməsinin qarşısını alacağını, gələcəkdə isə həmin mülkiyyəti qızlarına bağışlayacağını vəd edib. Bu vədlərə inanaraq sazişi imzalamağa məcbur olduğunu bildirən Əliyeva qeyd edib ki, həmin vaxt həm birinci qrup əlil olan qızının, həm nəvələrinin, həm də böyük ailəsinin evsiz qalmasından narahat olub.
Lakin iddiaçı bildirir ki, keçən müddət ərzində Ağadadaş Ağayev heç bir vədinə əməl etməyib, əksinə, qızına veriləcəyini dediyi bağ sahəsini hazırkı həyat yoldaşının adına keçirib. O, bunun gözlənilməz və ədalətsiz olduğunu qeyd edərək barışıq sazişinin ləğvini istəyib.
Məhkəmə işə baxaraq toplanmış materialları qiymətləndirib və Lalə Əliyevanın tələblərini əsaslı saymayıb. Qərara əsasən, 2018-ci il barışıq sazişində Əliyeva Mərdəkandakı bağ evinin Ağadadaş Ağayevin xüsusi mülkiyyəti olduğunu qəbul edib və bu əmlakdan imtinasını təsdiqləyib. Buna görə də həmin saziş əsasında verilmiş məhkəmə qərardadı evə çıxarışın alınması üçün qanuni əsas kimi tanınıb.
Proses zamanı nə Ağadadaş Ağayev, nə də onun nümayəndəsi iclasda iştirak etməyib. Məhkəmə tərəflərin gəlməməsini nəzərə alsa da, işə onların iştirakı olmadan baxmağı məqsədəuyğun hesab edib.
