Kənd təsərrüfatı sahəsində tətbiq olunan vergi güzəştləri balıqçılıq fəaliyyətinə də aid ediləcək.
Cenublu.az xəbər verir ki, bu, Prezident İlham Əliyevin təsdiqlədiyi Vergi Məcəlləsinə dəyişiklik edilməsi barədə Qanunda əksini tapıb.
Qanuna əsasən, 2027-ci il yanvarın 1-dək kənd təsərrüfatı məhsullarının (xarici mənşəli balıq məhsulları istisna olmaqla) topdan və pərakəndə satışı zamanı əlavə dəyər vergisi (ƏDV) ticarət əlavəsindən hesablanan verginin məbləği kimi tətbiq ediləcək.
Məlumat üçün bildirək ki, mövcud qanunvericiliyə əsasən, Azərbaycan Respublikası ərazisində istehsal olunan kənd təsərrüfatı məhsullarının pərakəndə satışı zamanı ƏDV ticarət əlavəsindən hesablanır. Bundan əlavə, 2022-ci il yanvarın 1-dən etibarən 5 il müddətinə kənd təsərrüfatı məhsullarının (yerli və xarici mənşəli) topdan və pərakəndə satışı zamanı da ƏDV ticarət əlavəsindən hesablanır.
Yeni dəyişikliklərə əsasən, Vergi Məcəlləsinin kənd təsərrüfatı məhsullarının istehsalı və satışı ilə bağlı müddəaları balıqçılıq fəaliyyətinə də şamil ediləcək. Qeyd olunur ki, balıq kürüsünün istehsalı bu güzəştlərə aid edilmir.
Emal əməliyyatlarına məruz qalmayan, yalnız kəsilmə və dondurulma əməliyyatları aparılan balıq məhsulları balıqyetişdirmə fəaliyyəti ilə məşğul olan şəxslər tərəfindən istehsal edildiyi halda, Vergi Məcəlləsinin məqsədləri üçün kənd təsərrüfatı məhsullarına bərabər tutulacaq.
Qeyd edək ki, Vergi Məcəlləsinə edilən dəyişikliklər 2026-cı il yanvarın 1-dən qüvvəyə minib.
