53 yaşlı Cəlilabad sakini qeyri-rəsmi münasibətdə olduğu qadını döyməkdə ittiham olunub. Hadisə Pirallahı qəsəbəsi, Xəzəryanı küçəsində yerləşən evdə baş verib. 1972-ci il təvəllüdlü Məhəmməd və dörd ildir qeyri-rəsmi şəkildə birlikdə yaşadığı Solmaz arasında şəxsi münasibətlər zəminində mübahisə yaranıb.
Məhkəmə materiallarına görə, hadisə günü Məhəmməd saat 21:00 radələrində sərxoş vəziyyətdə qadının yaşadığı ünvana gəlib, ac olduğunu deyərək ondan yemək istəyib. Yemək yedikdən sonra Solmazın “az iç” xəbərdarlığı səbəbindən tərəflər arasında mübahisə başlayıb. Məhəmməd əvvəlcə qadını qonaq otağında itələyib, daha sonra yumruq və təpiklə baş və bədən nahiyəsinə zərbələr endirib. Solmaz həyətə qaçmağa çalışdıqda, o, qadının arxasınca gedərək yenidən döyüb, saçından tutub həyətdə sürüyüb.
Zərərçəkmiş ifadəsində Məhəmmədin spirtli içkiyə meyilli olduğunu və bu səbəbdən tez-tez münaqişələrin yaşandığını bildirib. Məhəmməd isə istintaqa verdiyi ifadədə üzərinə qoyulan ittihamı qəbul etdiyini, sərxoş halda mübahisə zamanı Solmazı itələdiyini deyib.
Pirallahı Rayon Məhkəməsinin hökmü ilə Məhəmməd Cinayət Məcəlləsinin 128-ci maddəsi ilə təqsirli bilinərək 5 ay müddətinə azadlıqdan məhrum edilib. Cəzasını ümumi rejimli cəzaçəkmə müəssisəsində çəkəcək.
