Astaranın bir kəndində 1984-cü il təvəllüdlü Zaur şəxsi münasibətlər zəminində yaranan mübahisə zamanı oğlu Elçinə xəsarət yetirib. Hadisə 2025-ci il oktyabrın 20-i baş verib.
Məlumata görə, birlikdə yaşadıqları evdə baş verən mübahisə zamanı Zaur oğlunun burun nahiyəsinə kəllə ilə bir dəfə zərbə endirib. Ona Cinayət Məcəlləsinin qəsdən sağlamlığa zərər vurma maddəsi ilə ittiham elan edilib.
Zaur istintaqa ifadəsində özünü təqsirli bildiyini, hadisənin ailə mübahisəsi fonunda baş verdiyini deyib. Bildirib ki, həmin gün həyat yoldaşı Aynurə ilə mübahisə edərkən Elçin müdaxilə edib və bu zaman təsadüfən başı onun üzünə dəyib. O, törətdiyi əmələ görə peşman olduğunu söyləyib.
Zərərçəkmiş Elçinin sözlərinə görə, o və anası sitrus bağlarında fəhləlik edərək ailəni dolandırırlar: “Atam işləmir, spirtli içkiyə aludədir. Evdə tez-tez səbəbsiz münaqişələr yaradır. Həmin gün də siqaret və içki almağımı istədi. Siqaret alsam da, içkini qəsdən almadım ki, yenə içib dava salmasın. Evə qayıdanda bunu biləndə əsəbiləşdi, pul tələb etdi. Mübahisə zamanı atam başı ilə mənim üzümə zərbə vurdu. Qan kəsmədiyindən gecə xəstəxanaya getdik”. Elçin bildirib ki, atasının islah olunması üçün onun cəza almasını istəyir.
Astara Rayon Məhkəməsinin hökmü ilə Zaur 4 ay azadlıqdan məhrum edilib. Onun əvvəlki hökmü də nəzərə alınaraq cəza qəti olaraq 4 ay həbs və əlavə 1000 manat cərimə şəklində təyin olunub. Hökm qanuni qüvvəyə minənədək barəsində həbs qətimkan tədbiri seçilib və o, məhkəmə zalından həbs olunub. Cəzanın icrası 19 noyabr 2025-ci ildən hesablanacaq.
Qeyd edək ki, Zaur daha əvvəl həyat yoldaşına zorakılıq etdiyi üçün də məhkum olunmuşdu.
Sadalanan adlar şərtidir.
