Şirvan Apellyasiya Məhkəməsində on dörd yaşına çatmış, lakin on altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmədə təqsirləndirilən Səməd Bağırovun barəsindəki hökmdən verilən apellyasiya şikayəti üzrə məhkəmə prosesi başa çatıb.
İttihama görə, 1994-cü il təvəllüdlü Səməd Bağırov 12 yanvar 2024-cü il tarixdən 2024-cü ilin iyul ayının ortalarınadək qardaşının Beyləqan rayonu ərazisində yerləşən evində yetkinlik yaşına çatmamış, 2009-cu il təvəllüdlü zərərçəkmiş qızla onun razılığı ilə təbii yolla cinsi əlaqədə olub.
O, məhkəmə ifadəsində bildirib ki, cinayət işində zərərçəkmiş kimi tanınan qız hazırda onun həyat yoldaşıdır. Zərərçəkmiş şəxsi ailə qurmaq məqsədi ilə qaçırıb və hazırda onların 2025-ci ildə anadan olan uşaqları var.
Beyləqan Rayon Məhkəməsinin hökmü ilə ona 6 ay müddətə azadlıqdan məhrumetmə cəzası təyin edilib və məhkəmə iclas zalından dərhal həbsə alınıb.
Şirvan Apellyasiya Məhkəməsində verilən qərara əsasən, apellyasiya şikayəti təmin edilməyib.
Qeyd edək ki, ad və soyad şərtidir.
