Yağan intensiv yağış Lənkərana gözəllik qatdığı qədər də bir sıra fəsadlar yaradıb. Bu haqda bu gün, 7 dekabr tarixində Cenublu.az Oxu.az-a istinadən xəbər verir.
Belə ki, Azad İsmayılov küçəsində qazıntı işləri aparılıb. Amma sonradan yarımçıq saxlanılıb.
Mövcud kanalizasiya sistemi yağış sularını normal ötürmədiyindən xəndəklər dolub, izafi sular evlərin zirzəmilərinə, həyətlərinə yığılıb və yolları keçilməz edib. Küçənin bir tərəfindən qarşı tərəfə keçmək çətinliyi yaranıb.
Məsələ ilə bağlı Lənkəran Şəhər İcra Hakimiyyəti başçısının müavini Vüqar Məmmədov bildirib ki, xəndəklər təmizlənəcək.
Qeyd edilib ki, Lənkəran şəhərinin mövcud kanalizasiya sistemi ötən əsrin 60-70-ci illərində çəkilib və 20 min əhali üçün nəzərdə tutulub. Hazırda əhalinin sayı 80 minə çatdığından kanalizasiya şəbəkəsinin yenidən qurulmasına ehtiyac var.
