Salyan şəhərində fəaliyyət göstərən marketdə qida təhlükəsizliyi qaydalarının kobud şəkildə pozulduğu üzə çıxıb.
Cenublu.az xəbər verir ki, Qida Təhlükəsizliyi Agentliyinin əməkdaşları Bakı-Astara yolunun 130-cu kilometrində yerləşən, fiziki şəxs Ələkbərova Bahar Ağasəf qızına məxsus "Aystore" marketdə yoxlama keçirib.
Yoxlama zamanı obyektin qida təhlükəsizliyi qeydiyyatından keçmədən fəaliyyət göstərdiyi müəyyən olunub. Eyni zamanda temperatur rejiminin monitorinqinin aparılmadığı, havalandırma sisteminin qurulmadığı və digər nöqsanlar aşkar edilib.
Bundan əlavə, istifadəyə yararsız, vaxtı keçmiş qida məhsulları, eləcə də etiket məlumatlarında uyğunsuzluqlar olan saxta alkoqollu içkilər aşkarlanıb. Satışa çıxarılan məhsullarla bağlı müvafiq müşayiətedici sənədlərin təqdim olunmadığı da məlum olub.
Faktla bağlı qanunvericiliyə uyğun tədbirlər görülüb. Yararsız məhsulların satışının dayandırılması barədə qərar qəbul edilib, nümunələr götürülərək araşdırmalar davam etdirilir.
