Qida Təhlükəsizliyi Agentliyi Sabirabad şəhərində fəaliyyət göstərən ictimai iaşə obyektində ciddi nöqsanlar aşkarlayıb.
Cenublu.az xəbər verir ki, Agentlik tərəfindən Sabirabad şəhəri, 20 Yanvar küçəsində yerləşən, Eyyubov Emil Eyyub oğluna məxsus ictimai iaşə obyektində aparılan yoxlama zamanı qida təhlükəsizliyi sahəsində normativ tələblərin pozulduğu müəyyən edilib.
Yoxlama zamanı temperaturun monitorinqi və qeydiyyatının aparılmadığı, istehsalat sahələrinin quruluşu və təchizatına dair tələblərə əməl edilmədiyi, qida ilə təmasda olan səthlərin yuyulabilən və korroziyaya davamlı materialdan hazırlanmadığı, işçi heyətin xüsusi geyimlə təmin edilmədiyi, qida komponenti kimi istifadə olunan suyun filtrdən keçirilmədiyi, həmçinin təmizlik işlərinin lazımi səviyyədə təşkil olunmadığı və digər nöqsanlar aşkarlanıb.
Aşkar edilmiş nöqsanlarla bağlı obyektin fəaliyyəti çatışmazlıqlar aradan qaldırılanadək məhdudlaşdırılıb, müəssisə rəhbəri isə inzibati məsuliyyətə cəlb edilib.
