Azərbaycan Qida Təhlükəsizliyi Agentliyi tərəfindən Şiləvar kəndi ərazisində fəaliyyət göstərən ərzaq mağazasında plandankənar yoxlama aparılıb.
Cenublu.az xəbər verir ki, yoxlama zamanı vəzifəli şəxs Nəsirov Cavid Aydın oğluna məxsus mağazada son istifadə müddəti bitmiş müxtəlif məhsullar aşkarlanıb. Belə ki, mağazada 45 adda, ümumi çəkisi 38,822 kiloqram olan quru qida məhsulları, həmçinin 46,14 litr müxtəlif əmtəə nişanlı alkoqolsuz içkilərin istifadəyə yararsız olduğu müəyyən edilib.
Aşkarlanan məhsullar satışdan kənarlaşdırılıb. Eyni zamanda normativ texniki tələblərə cavab verməyən və istifadə müddəti bitmiş məhsullarla bağlı məhdudlaşdırıcı qərar qəbul olunub.
Faktla bağlı qanunvericiliyin tələblərinə uyğun müvafiq tədbirlər görülüb, sahibkar barəsində inzibati protokol tərtib edilib.
