Azərbaycan Respublikası Qida Təhlükəsizliyi Agentliyinin (AQTA) əməkdaşları Lənkəran rayonunda növbəti yoxlama həyata keçiriblər.
Cenublu.az xəbər verir ki, AQTA əməkdaşları tərəfindən rayonun Qurunba kəndində fiziki şəxs Zakir Əkbərova məxsus mağazada aparılan yoxlama zamanı qida təhlükəsizliyi sahəsində normativ hüquqi aktların tələblərinin pozulduğu müəyyən edilib.
Yoxlama zamanı satış obyektində müxtəlif əmtəə nişanlı saxta alkoqollu içkilər, eləcə də mənşəyini və təhlükəsizliyini təsdiq edən müvafiq müşayiətedici sənədləri olmayan toyuq məhsulları aşkarlanıb.
Aşkar edilmiş məhsullar agentliyin əməkdaşları tərəfindən satışdan kənarlaşdırılıb. Faktla bağlı qanunvericiliyə uyğun olaraq inzibati protokol tərtib edilib, məhsullardan nümunələr götürülərək laborator müayinələrə göndərilib. AQTA tərəfindən araşdırmalar davam etdirilir.
