Qida Təhlükəsizliyi Agentliyi (AQTA) tərəfindən İmişli şəhəri, S. Fətəliyev küçəsində fəaliyyət göstərən fiziki şəxs Azər Həsənova məxsus çörək emalı müəssisəsində plandankənar yoxlama aparılıb.
Cenublu.az xəbər verir ki, yoxlama zamanı müəssisədə qida təhlükəsizliyi sahəsində qüvvədə olan texniki normativ hüquqi aktların və sanitariya norma-qaydalarının bir sıra tələblərinin pozulduğu müəyyən edilib. Belə ki, istehsalatda istifadə olunan suyun filtrasiyadan keçirilmədiyi, dezinfeksiya, dezinseksiya və deratizasiya tədbirlərinin isə mütəmadi həyata keçirilmədiyi aşkarlanıb.
Aşkar edilmiş uyğunsuzluqlarla bağlı müəssisə rəhbəri barəsində inzibati xəta haqqında protokol tərtib olunub. Qida obyektinin fəaliyyəti nöqsanlar tam aradan qaldırılanadək müvəqqəti olaraq dayandırılıb.
