Lənkəranda “Vətən müharibəsi” zamanı şəhadətə ucalan igidin adına xatirə lövhəsi açılıb. Bu haqda məlumat bu gün, 4 dekabr tarixində Lənkəran Şəhər İcra Hakimiyyətinin rəsmi Facebook səhifəsində paylaşılıb.
Şəhid Abıyev Vasifin xatirəsinə Nərimanabad qəsəbəsində əbədiləşdirilən lövhənin açılış mərasimində Lənkəran ŞİH başçısı Taleh Qaraşov, şəhid ailə üzvləri və valideynləri, Qarabağ qaziləri, ictimaiyyət nümayəndələri iştirak ediblər.
Tədbirin sonunda qonaqlar şəhidin dəfn olunduğu qəbirstanlığı ziyarət ediblər. Onun məzarının qarşısına gül-çiçək dəstələri düzülüb, ruhuna dualar oxunub, ehsan verilib.
35 yaşlı Abıyev Vasif Vaqif oğlu Lənkəran şəhəri Nərimanabad 1 qəsəbəsində anadan olub. Könüllü olaraq ordu sıralarına yazılan Vüsal, yeganə övladını anasına əmanət edərək müharibəyə yollanıb.
Qəhrəman əsgər ölümündən sonra “Vətən uğrunda” , “Xocavəndin azad olunmasına görə” , “Füzulinin azad olunmasına görə” və
“Cəsur döyüşçü” medalları ilə təltif edilib.
