Lənkəran rayonu Parakənd kənd tam orta məktəbinin şagirdləri dərsə getmək üçün hər gün təhlükə ilə üz-üzə qalırlar. Bu haqda məlumatı Cenublu.az bu gün, 5 may tarixində Space TV-yə istinadən verir.
Belə ki, məktəbin qarşısından keçən yolda avtomobillərin sürətlə hərəkət etməsi səbəbindən valideynlər uşaqları məktəbə göndərməyə ehtiyat edirlər.
Sakinlər deyirlər ki, magistralda sürücülərin sürət həddini aşması təkcə şagirdlər üçün deyil, eyni zamanda digər vətəndaşlar üçün də təhlükə yaradır.
Problemin həlli istiqamətində ilkin addımlar atılıb. İlk növbədə müvafiq qurumun əməkdaşları əraziyə gələrək yola piyada zolağı çəkib və yol nişanı quraşdırıblar.
Toğrul Nəsirli, BDYPİ-nin əməkdaşı: “Vətəndaşların müraciəti əsasında tərəfimizdən həmin ərazidə monitorinq təhlili aparılacaq və nəticəyə uyğun olaraq, tədbirlər həyata keçiriləcək”.
Qeyd edək ki, Parakənd kəndində 400-dən çox ailə yaşayır.
