Son 12 saat ərzində Lənkəranda iki yanğın baş verib. Bu haqda məlumatı 14 avqust Fövqəladə Hallar Nazirliyinin (FHN) rəsmi saytı verib.
Səhər saat 05.00 radələrində Lənkəran şəhərində ümumi sahəsi 250 m² (hər mərtəbəsi 125 m²) olan ikimərtəbəli evin 2-ci mərtəbəsində yanğın baş verib. Nəticədə 1 otağın və dəhlizin 40 m² sahəsi yanıb. Evin qalan hissəsi yanğından mühafizə olunub.
İkinci yanğın səhər saat 07.00 radələrində rayonun Bala Şürük kəndində baş verib. Ümumi sahəsi 60 m² olan tövlənin dam örtüyü və damına yığılan 6 ton ot bağlaması yanıb. Tövlənin qalan hissəsi yanğından mühafizə olunub.
Hər iki yanğın FHN əməkdaşları tərəfindən söndürülüb. Ölən və xəsarət alan yoxdur.
