Astarada arıçılar xeyli bal süzsələr də, satışla bağlı problem yaşayırlar. Bu haqda məlumatı 8 sentyabr Apa tv paylaşıb.
Belə ki, arıçıların sözlərinə görə, keçən il süzdükləri balın yarısını sata bilməyiblər.
“Bu il 1 tona yaxın bal götürmüşük, amma təxminən 40-45 arı ailəsi qalıb. Demək olar ki, balı süzməyə həvəsimiz də qalmayıb. Onlayn qaydada satırıq. Müştərilər 2 kq, 3 kq, 5 kq istəyirlər, göndəririk. Bu isə bizim işimizi görmür. Keçən il təxminən 1 ton – 1 ton 200 kq əldə etdiyimiz balın təqribi 800 – 850 kq-ı əlimizdə qalıb” – arıçı Fərid Salayev deyir.
Həmçinin, arıçılar deyir ki, pandemiya ilə əlaqədar artıq 2 ildir ki, məhsullarını satmaq üçün yarmarkalar təşkil olunmur.
Astara Arıçılar Cəmiyyətinin sədri Arif Nəzirov bildirib ki, arıçıların keçən ilki məhsulları xarlanmış vəziyyətdə onların anbarlarında durur: “Bu ilki məhsulun da demək olar ki, 30%-i satılıb, qalanı isə elə də durur. Dövlətimizdən xahiş edirik ki, arıçılar üçün sərgi-satış yarmarkası təşkil etsin”.
Qeyd edək ki, rayonda 1200 nəfərdən çox arıçı, 30 000-ə yaxın arı ailəsi var. İl ərzində iki dəfə – iyun və sentyabr aylarının əvvəllərində bal süzümü olur. Balın 1 kiloqramı 20-25 manata satılır.
